Alejandro Balde: Qolish yoki Ketish?
Yozgi oynaning so‘nggi kunlari yaqinlashar ekan, Barcelona ichida eng nozik savollardan biri tobora aniq ko‘rinish ola boshladi: Alejandro Balde qoladimi yoki ketadimi?
Chap qanot himoyachisiga Manchester United jiddiy qiziqmoqda. Balde o‘zi klubda baxtli, lekin bu hafta agenti bilan uchrashgani haqida xabarlar paydo bo‘ldi. Bu tasodifiy uchrashuv emas. Bu – kelajakni stol ustiga qo‘yib, ochiqchasiga muhokama qilish darajasidagi vaziyat.
Sabab ham aniq: João Cancelo endi Barcelona futbolchisi sifatida to‘liq qaytdi. Demak, chap qanotdagi raqobat ham, maydondagi daqiqalar uchun kurash ham keskinlashadi. Balde uchun bu mavsum “asosiy tarkib yulduzi” bo‘lishi ham, “zaxira variant”ga aylanib qolishi ham mumkin.
Flick savolni chetlab o‘tmadi
Murabbiy Hansi Flick shanba kuni matbuot anjumanida aynan Balde haqida so‘raldi. Oddiy, diplomatik javob berish oson edi. U buni tanlamadi.
“Bu qiyin savol, chunki u ulkan sifatga ega futbolchi, – dedi Flick. – Muhimi, o‘zi o‘z pozitsiyasida raqobatlasha olishiga ishonyaptimi-yo‘qmi, shuni bilish. Men buni barcha futbolchilarimdan ko‘rmoqchiman. Har kuni ularning nima qilayotganini, darajasini, o‘ynashga loyiq ekanini ko‘rsatishyaptimi-yo‘qmi, kuzataman. Oxir-oqibat biz jamoa bo‘lib o‘ynashimiz kerak, shundagina muvaffaqiyatga erishamiz. Menga har bir futbolchi yuz foiz tayyor bo‘lishi kerak.”
Shu bilan hammasi aytilgandek bo‘ldi. Flick “Balde menga yoqadi, qolishini istayman” deb qo‘ya qolishi mumkin edi. U bunday qilmadi. U savolni Baldening o‘ziga qaytardi: qolib, pozitsiyasi uchun tish-tirnog‘igacha kurashadimi yoki guruh ichida shunchaki navbat kutib yuradimi?
Barcelona’da yangi tartib: raqobat yoki chiqish eshigi
Flickning pozitsiyasi tobora ravshanlashmoqda. U har bir chiziqda maksimal raqobat bo‘lishini xohlaydi. Barcelona endi “ism”lar uchun emas, holat va mentalitet uchun o‘ynaydigan jamoaga aylanishi kerak.
Kimdir zaxirada qolishga rozi bo‘lsa, bu murabbiy uchun signal: bu yer emas. Bunday futbolchi uchun eng to‘g‘ri yo‘l – ketish.
Balde uchun bu juda aniq chaqiriq: Cancelo qaytgan, pozitsiya uchun bosim oshgan, Manchester United eshigi ochiq. Endi navbat unda. U Camp Nou gazonida o‘z o‘rnini tishlab ushlab qoladimi yoki yangi sahifani Old Traffordda ochadimi?
Flickning so‘zlari shunchaki matbuot anjumanidagi javob emas edi. Bu butun jamoaga yuborilgan qat’iy signal: Barcelona’da endi faqat kurashadiganlar qoladi.
