Adrian Newey: Fernando Alonso Aston Martin uchun muhim
Budapesht paddokida e’tibor yana bir bor bitta ismga qaytdi. Fernando Alonso. Uning 2027 yilga kelib ham Aston Martin bilan qolishi mumkinmi, degan savolga javobni esa jamoaning bosh miyasiga aylangan Adrian Neweyning o‘zi berdi.
2023 yil. Silverstone yaqinidagi baza, yangi loyiha, yangi umid. Alonso Aston Martin bilan ilk mavsumidayoq portlab chiqdi: ketma-ket poygalarda podiumlar, Monacoda va Zandvoortda P2, yakunda haydovchilar chempionatida P4. 40 yoshdan oshgan ikki karra chempion yana bir bor o‘zini eng yuqori darajada isbotlagan edi.
Keyingi yillar esa bunday shiddatni takrorlamadi. Jamoa asta-sekin ortga sirg‘aldi, natijalar notekis bo‘ldi. 2026 yil boshidagi yangi texnik reglamentlar esa Aston Martin uchun og‘ir zarba bo‘ldi – mavsum starti kutilganidan ancha murakkab kechdi.
Shunga qaramay, umid uchquni yo‘qolgani yo‘q. Vengriya Gran-prisida katta yangilanish paketi mashinaga olib kelindi va birinchi belgilardan ma’lum bo‘ldiki, yo‘l to‘g‘ri tanlangan. Lekin bu hali faqat birinchi qadam. Oldinda katta masofa bor. Aynan shuning uchun Alonso kelajagi haqida mish-mishlar kuchaymoqda: u bu loyihada qoladimi yoki boshqa yo‘lni tanlaydimi?
Budapesht hafta oxirida Adrian Neweydan aynan shu savol so‘raldi: Fernando Alonso bilan shartnomani uzaytirish Aston Martin uchun qanchalik ustuvor vazifa va u ispaniyalik yulduzning qolishiga qanchalik ishonadi?
Newey ikkilanmadi: “Albatta, Fernando ajoyib haydovchi. U jamoaga fikr-mulohazasi ham, mahorati bilan ham ulkan hissa qo‘shadi. Demak, biz uchun u juda muhim”, – dedi u. So‘ng esa yanada ochiq gapirdi: “Menimcha, Fernando bu yerda o‘z vaqtini yoqtiryapti va biz munosabatlarimizni davom ettiramiz, degan ishonchim katta”.
Yuqori darajadagi texnik mutaxassisning bunday ohangi Aston Martin garajida Alonso atrofidagi ishonch hali ham mustahkamligini ko‘rsatadi.
Alonso: “Menda shubha yo‘q – bu jamoa mashinani tuzatadi”
Xuddi shu hafta oxirida Alonso ham o‘z kelajagi haqida gapirishga majbur bo‘ldi. Savollar ko‘p, ammo uning ohangi sokin, hatto ishonchli edi.
“It’s not that I need answers,” – deya gap boshlagan ispaniyalik, keyinroq fikrini aniq qilib berdi: u jamoaning ichki holatini yetarlicha yaxshi bilishini, muammolar hal bo‘lishiga to‘liq ishonganini aytdi. Uning so‘zlariga ko‘ra, bu jarayon vaqt talab qiladi, xolos. U “Adrian gridda eng yaxshi mashinani baribir beradi, erta bo‘ladimi yoki kech”ligiga “nol shubha” bilan qarayotganini ta’kidladi.
Alonso yangi paketning ilk qadami qanday ishlashini ko‘rishni xohlayotganini aytdi: bir-ikki poygadan keyin bu yo‘nalish qanchalik to‘g‘ri ekani aniqroq bo‘ladi. U keyingi yil ham, undan keyingi yillarda ham yangilanishlar kelishiga ishonadi.
Quvvat qurilmasi haqida so‘z borganda ham u ohangini o‘zgartirmadi. Honda bilan hamkorlik og‘ir boshlangani, jamoa “orqadan start olgani”ni tan oldi, ammo bu ham faqat vaqt masalasi ekanini aytdi. Hozir og‘riqli jarayon ketmoqda, dam olish kunlarida qiynalayotgan bo‘lsalar-da, yechim ustida birgalikda ishlashayotganini urg‘uladi.
Eng katta savol esa bitta: mashina qachon raqobatbardosh bo‘ladi? Alonso aynan shuni “savol belgisi” deb atadi. Uning fikricha, keyingi ikki poyga jamoaga bu borada ilk sezilarli hisni berishi mumkin.
Shunga qaramay, u o‘zini xotirjam his qilayotganini yashirmadi. “Men o‘zimni tetik, motivatsiyalangan va tez his qilyapman”, – dedi u. Bu so‘zlar paddokda ko‘p narsani anglatadi: Alonso hali ham kurashmoqchi.
Va nihoyat, u barcha mish-mishlarga qisqa, lekin aniq nuqta qo‘ydi: “I do have a contract, so I’m not moving!”
Aston Martin garajida bu gaplar devorlardan qaytib, ichkarida yangrayotgandek: yangi reglamentlar, yangi paketlar, Honda bilan og‘riqli, ammo zarur evolyutsiya – hammasi bir savolga borib taqaladi. Newey va Alonso birgalikda bu loyihani yana cho‘qqiga olib chiqishga ulguradimi?
