2030-yilgi Jahon chempionati finali Ispaniyada o‘tkazilishi kerak
2030-yilgi Jahon chempionati finali qayerda o‘tkaziladi? Rasman hali hech narsa e’lon qilingani yo‘q, lekin Ispaniya siyosiy darajada allaqachon maydonga tushdi. Bosh vazir Pedro Sanchez ochiqchasiga aytdi: hukumat finalning Ispaniyadan chiqib ketishiga yo‘l qo‘ymaydi.
U dushanba kuni “SER” telekanaliga bergan intervyusida shunday dedi: hukumat “final aynan bu yerda o‘tkazilishi uchun ishlaydi”. Savol aniq edi – FIFA prezidenti Gianni Infantino hal qiluvchi uchrashuvni Marokashga ko‘chirishga erishishi mumkinmi? Sanchez javobni cho‘zib o‘tirmadi, masalani sport va siyosat kesishgan nuqtaga olib chiqdi: Ispaniya nafaqat mezbon, balki o‘z maydonida chempionlikni nishonlashga haqli mamlakat sifatida ko‘rsatildi.
Ikki karra chempionlik – siyosiy dalilga aylangan rekord
Sanchez pozitsiyasining tayanchi – “La Roja”ning so‘nggi yillardagi natijalari. Ispaniya 2010-yilda Janubiy Afrikada ilk bor Jahon chempioni bo‘ldi. Oradan o‘tgan o‘n yillikdan keyin esa sahna yana ular uchun ochildi: AQSh, Meksika va Kanada mezbonlik qilgan joriy mundialda ikkinchi marta kubokni ko‘tardi.
19-iyul kuni Argentina ustidan kelgan g‘alaba bu da’voni yanada mustahkamladi. Ferran Torresning qo‘shimcha bo‘limdagi yagona goli finalni hal qildi, Ispaniya esa ikkinchi marta olamshumul sovrinni qo‘lga kiritdi. Sanchez nazarida bu natijalar tasodifiy emas, balki mamlakatni futbol markazlaridan biri sifatida tasdiqlab turibdi. Shuning uchun ham u “Ispaniya o‘z maydonida Jahon chempionatini yutadigan payt keldi”, degan fikrni ochiq aytyapti.
Uch qit’ali mundial va final atrofidagi jim bo‘lmagan kurash
2030-yilgi Jahon chempionati allaqachon o‘ziga xos turnir sifatida tarixga kirishi aniq. Musobaqani Ispaniya, Portugaliya va Marokash birgalikda qabul qiladi, dastlabki uchrashuvlar esa Janubiy Amerikaga qaytadi. Uruguay, Argentina va Paraguay o‘z maydonida ochilish o‘yinlarini o‘tkazadi – 1930-yilda Montevideoda start olgan birinchi mundialga ramziy ishora sifatida.
Shu fon’da eng katta savol ochiq qolmoqda: final qayerda bo‘ladi? Aynan shu nuqtada futbol geografiyasi siyosiy xaritaga ulanib ketdi. Marokash o‘z pozitsiyasini kuchaytirishga urinmoqda, Afrika qit’asi uchun tarixiy finalni ko‘rish istagi katta. Ispaniya esa bunga javoban hukumat darajasida javob berdi – endi bu oddiy sport loyihasi emas, davlat obro‘si masalasi.
Final mezboni hali rasman tasdiqlanmagan, lekin poyga allaqachon tezlik oldi. Bir tomonda yangi tarix yozmoqchi bo‘lgan Marokash, ikkinchi tomonda esa ikki karra jahon chempioni sifatida o‘z maydonida yakuniy sahnani talab qilayotgan Ispaniya.
Savol endi shunday: FIFA siyosiy bosim, tarixiy ramzlar va sport mantig‘i orasida qaysi yo‘lni tanlaydi – Madridning orzusi ustun keladimi yoki final kubogi Tangier va Rabat oralig‘idagi osmon ostida ko‘tariladimi?
