15 yoshli JJ Gabriel: Manchester Uniteddan ketish yoki qolish?
Manchesterning shimolida, akademiya eshiklari ortida odatda bu qadar shovqin bo‘lmaydi. Ammo hozir hamma gap bitta ism atrofida: JJ Gabriel.
15 yoshli hujumchi va uning vakillari hozircha futbol xaritasining eng issiq nuqtalaridan birida – Barcelona shahrida. Kataloniyalik gigant bilan potentsial transfer bo‘yicha muzokaralar boshlangan, bu esa allaqachon yevropalik yirik klublar o‘rtasidagi yashirin poygani ochiq sahnaga olib chiqdi.
Old Trafforddan chiqish eshigi tomon
Gabriel atrofidagi vaziyat endi oddiy “qiziqish” darajasidan ancha o‘tib ketdi. Unga bir nechta Premier League jamoalari, shuningdek Real Madrid, Barcelona, Paris Saint-Germain va Bayern Munich nazar tashlagan. Bular shunchaki yozgi mish-mishlar emas – futbolchi va uning jamoasi Unitedni tark etish bo‘yicha rasmiy so‘rov topshirgan.
Uning shartnomasi mavsum oxirigacha amal qiladi, klub rahbariyati esa uni qolishga ko‘ndirishga urinmoqda. Lekin kayfiyat boshqacha: Gabrielning Old Trafforddan ketishga tobora yaqinlashayotgani sezilib turibdi.
Bu jarayonning burilish nuqtasi o‘tgan hafta bo‘ldi. UEFA Youth League doirasida Sabahga qarshi o‘yinda United 5:0 hisobida g‘alaba qozondi, uchrashuv yulduzi esa aynan JJ Gabriel bo‘ldi – u het-trik qayd etdi. O‘yin tugagach esa u va vakillari klubdan de-registratsiya qilish bo‘yicha rasmiy so‘rovni topshirdi.
Shundan beri Gabriel United bilan mashg‘ulotlarga qaytmadi.
FIFA bo‘shlig‘i va Yevropaga eshik
Bu hikoyaning eng qiziq qismi huquqiy maydonda. Amaldagi tajriba va FIFA qoidalaridagi bo‘shliq sabab, Gabriel 16 yoshga to‘lgach – 6 oktyabr kuni – Yevropadagi boshqa klubga o‘tish imkoniyatiga ega bo‘lishi mumkin. Buning uchun u ota-onasidan biri orqali Yevropa pasportini qo‘lga kiritishi kerak.
Nazariy jihatdan yo‘l ochiqdek. Ammo har qanday transfer baribir FIFA tasdig‘iga bog‘liq bo‘ladi. Shuning uchun bu ish faqat agentlar va skautlar o‘rtasidagi poyga emas, balki huquqshunoslar va reglamentni yod olgan mutaxassislar jangi ham bo‘lib bormoqda.
Gabriel uchun yana bir g‘alati burilish: u yaqinda e’lon qilingan Angliya yoshlar terma jamoalari ro‘yxatiga kiritilmadi. Holbuki u yaqinda U17 darajasida Angliyani himoya qilgan edi. Bu ham uning kelajagi atrofidagi savollarni yanada ko‘paytirdi.
Carrickning ehtiyotkor pozitsiyasi
United bosh murabbiyi Michael Carrick bu borada ochiqchasiga gapirishdan tiyildi. U juma kuni berilgan savolga javob berar ekan, masalaning nozikligini urg‘ulash bilan cheklandi.
“U juda yosh bola, JJ,” – dedi Carrick. – “Biz bu narsalarni bu yerda oshkora o‘ynashimiz kerak deb o‘ylamayman. E’tibor, bosim – bularning barchasiga ehtiyotkorlik bilan yondashish kerak. Avvalo uning o‘zi haqida o‘ylash lo‘zim. Vaziyat qanday bo‘lishi kerak bo‘lsa, shunday hal bo‘ladi. Muhimi – u o‘zini yaxshi his qilsin.”
Murabbiyning ohangi aniq: klub ichkarida keskin harakat qilayotgan bo‘lsa-da, omma oldida Gabrielni himoya qilishga urinmoqda.
“Bu bolani yo‘qotish – ulkan zarba bo‘ladi”
Tajribali mutaxassis Paul Merson esa masalaga ancha keskinroq qaradi. U JJ Gabrielni “ishonib bo‘lmaydigan darajada iqtidorli” deb atadi va uning ketishi United uchun qanchalik og‘ir bo‘lishini ochiq aytdi.
Mersonning fikricha, bu avlod bolalari oldingi davrlarnikidan butunlay boshqacha fikrlaydi. U misol sifatida Arsenaldagi Max Dowman va Liverpooldagi Rio Ngumohani keltirdi – ikkisi ham allaqachon katta jamoada imkoniyat olayotgan, o‘yinlarda o‘zini ko‘rsatayotgan yoshlar.
Shu fon Gabrielning ichki savoli aniq ko‘rinadi: “Nega men ham hozir Man Utd safida o‘ynamasligim kerak?”
Merson shunday deydi: bu – bugungi futbolning asosiy muammolaridan biri. 16 yoshida katta sahnaga chiqish endi noodatiy emas, deyarli talabga aylanib bormoqda. Iqtidorli bolalar zudlik bilan maydon, daqiqa va e’tibor istashadi. Sabrsizlik – ularning ham kuchi, ham xavfi.
Merson yakunda bir fikrni alohida urg‘uladi: agar Gabriel ketadigan bo‘lsa, Unitedni nafaqat Angliyada, balki butun dunyoda uni o‘z safiga qo‘shib olishni istagan klublar qurshab oladi.
Savol ochiq: United ushlab qola oladimi?
Hozircha asosiy sahna Barcelonada. Muzokaralar davom etmoqda, yirik klublar kuzatmoqda, Manchester esa o‘z akademiyasining navbatdagi durdonasini yo‘qotmaslik uchun kurashmoqda.
Bir tomonda – tarix va nomdor klub, boshqa tomonda – tezroq maydonga tushish orzusi, Yevropa gigantlarining va’dalari va FIFA reglamentidagi kichik, ammo hal qiluvchi bo‘shliq.
JJ Gabriel 16 yoshga kirish arafasida turibdi. Savol esa keskin: u bu tug‘ilgan kunini hali ham United futbolchisi sifatida kutib oladimi yoki yangi manzil allaqachon belgilab bo‘linganmi?
