UZB sport

Robin Uthappa: Mumbai Indians uchun yangi murabbiylik davri

Dubai issig‘ida u mikrofon ortida turib, ILT20 o‘yinlarini tahlil qilmoqda. Ammo Robin Uthappa uchun bu faqat efir vaqti emas. Bu — uning yangi hayot bosqichiga, murabbiylikka kirib kelayotgan davri.

Endi u Mumbai Indians hujum chizig‘ining bosh me’mori.

Besh karra IPL chempioni bo‘lgan, lekin so‘nggi yillarda yo‘lini yo‘qotib qo‘ygandek ko‘ringan klub qayta qurilish o‘rtasida. Trenerlar shtabida o‘zgarishlar, tarkibda yangilanishlar, muxlislar orasida esa savollar ko‘p. Shunday paytda MI rahbariyati qarorni “chap qanotdan” topdi — Uthappa endi klubning batting murabbiyi.

Uning o‘zi ham bu qo‘ng‘iroqni kutmagan.

“Bu butunlay leftfield edi. Kutmagan edim. Lekin franchayzega yordam bera olishimga ishonganman,” — deydi u.

Olti klub, 205 o‘yin, 4952 run — va endi boshqa rol

Uthappa nomi IPL tarixida allaqachon o‘yib yozilgan. MI, Royal Challengers Bengaluru, Pune Warriors India, Kolkata Knight Riders, Rajasthan Royals, Chennai Super Kings — u olti xil libosda maydonga tushdi. 205 uchrashuv, 4952 run, 130.35 zarba tezligi va 27 ta ellik.

Endi esa u shu tajribani boshqa tomondan ishga soladi.

U so‘nggi uch-to‘rt yilni Dubayda, ko‘z-ko‘z qilinmaydigan, ammo juda shaxsiy maydonda o‘tkazdi: birma-bir mashg‘ulotlar, yulduz va istiqbolli kriketchilar bilan yopiq eshiklar ortida ishlash. Guruh mashg‘ulotlari emas, murakkab tizimlar emas — balki har bir o‘yinchini alohida tushunish, uning ichki “mexanikasi”ni tuzatish.

“Men har doim murabbiylik qilardim. Faqat rasmiy ravishda franchayze uchun — MI bilan — ikki oy bo‘ldi xolos,” — deydi u.

MI o‘zini “underdog” deb his qilayotgan payt

Mumbai Indians uchun bu mavsum oddiy qayta boshlash emas. Bu — obro‘ni qayta yutib olish urinishidir.

Uthappa buni yashirmaydi.

“Biz o‘zimizni underdogdek his qilyapmiz. Yana noldan isbotlashimiz kerak. Muxlislarning ishonchini qayta topishimiz kerak,” — deydi u.

Uningcha, hujum murabbiyi sifatida birinchi vazifa — texnikani o‘zgartirish emas, kayfiyatni. Ichkarida “baxtli ekotizim” qurish. Chunki u ishonadi: xursand jamoa — samarali jamoa.

U natijani va’da qilmaydi, lekin sharoitni va’da qiladi. O‘yinchilar o‘zini erkin, himoyalangan va tayyor his qiladigan muhit.

“Hech kim mother cricketdan katta emas”

MI safida ishlash degani — katta ism va katta egolar bilan ishlash degani. Rohit Sharma, Suryakumar Yadav, Tilak Varma… Lekin Uthappa uchun bu faqat yulduzlar to‘plami emas. Bu — o‘yin o‘zidan kattaroq emasligini unutmaydigan odamlar.

Uning asosiy falsafasi oddiy, lekin qat’iy:

“Hech kim mother cricketdan katta emas. O‘yinga shogird sifatida yondashsang, o‘zingga eng yaxshi imkoniyatni berasan,” — deydi u.

U yulduz o‘yinchilardan ham eng avvalo bir narsani kutadi: aniqlik. Turnir boshlanishidan oldin o‘z o‘yini, jamoa maqsadi, roli bo‘yicha toza tasavvur. Murabbiy sifatida u o‘sha aniqlikni ta’minlashga harakat qiladi — tayyorgarlik, suhbat, oddiygina yonida bo‘lish orqali.

“Ba’zan shunchaki yoningda odam borligi — katta ne’mat. Ayniqsa tajribali o‘yinchilar uchun,” — deydi u.

Yangi kapitan, auksion, savollar ko‘p — javoblar keyin

Mumbai Indians uchun bu faqat murabbiylik shtabidagi o‘zgarish emas. Yangi kapitan, tarkibni qayta yig‘ish, auksion oldi strategiyasi. Bularning bari hozircha yopiq eshiklar ortida.

Uthappa bu mavzuda ehtiyotkor.

Auksion yaqinlashar ekan, u aniq rejalar haqida gapirishdan tiyiladi. “Juda ko‘p harakatdagi bo‘laklar” borligini aytadi va bu haqda keyinroq gapirish ma’qul deya izohlaydi. Hozircha u MI ichkarisida ruhiy asosni qurishga ko‘proq urg‘u bermoqda.

“250 strike rate” yo‘q, lekin ishonch bor

Bugungi T20 kriketda yuqori qismda 250 va undan yuqori zarba tezligiga ega o‘yinchi — oltindek qimmat. Rajasthan Royalsdagi Vaibhav Sooryavanshi, Sunrisers Hyderabaddagi Abhishek Sharma bunga misol sifatida tilga olinadi. Savol tug‘iladi: MI safida bunday profil bormi?

Hozircha yo‘qdek ko‘rinadi.

Uthappa esa bu bo‘shliqni ikki yo‘l bilan ko‘radi: auksion orqali yoki mavjud tarkib ichidan.

“Auksionda imkoniyat bo‘lsa, ko‘ramiz. Lekin rostini aytsam, menimcha, hozirgi tarkibning o‘zida ham yetarlicha iste’dod bor,” — deydi u. — “To‘g‘ri muhit yaratsangiz, o‘yinchilardan qanday daraja chiqishi ba’zan hayratlanarli bo‘ladi.”

U MI hujum chizig‘ini boshqatdan qurishni “profil ovlash” emas, balki “ichkaridan ochish” deb ko‘radi.

Murabbiy sifatida brendi: ko‘zgudek bo‘lish

Uthappa o‘zini buyruq beruvchi emas, yo‘l ko‘rsatuvchi deb biladi. Uningcha, yaxshi murabbiy o‘yinchini o‘zi xohlagan manzilga yetkazadigan yo‘lni ko‘rsatadi, xolos.

“Men o‘yinchini u turgan joyidan olib, u bo‘lishni istagan darajaga ko‘tarishga yordam beraman. Turtki o‘zidan chiqishi kerak. Men esa faqat ko‘zgu bo‘laman, uni o‘zi qo‘ygan maqsadlari uchun javobgar qilib turaman,” — deydi u.

U uchun eng yuqori qadriyat — ishonch.

O‘yinchi murabbiyga nafaqat texnik savol bilan, balki butun karerasi haqida gaplashishga bemalol bora olishi kerak. Chunki bu savollarni hamma bilan baham ko‘rishmaydi. Uthappa aynan shu yopiq suhbatlarni murabbiylik ishining yuragi deb biladi.

Texnikani emas, “biomexanika”ni sindirish

Zamonaviy T20 jadvali shafqatsiz. Bir o‘yin tugamasidan boshqasi boshlanadi. Mashg‘ulotga vaqt oz. Katta texnik o‘zgarishlar qilish deyarli imkonsiz.

Uthappa bu holatni yaxshi biladi va yechimni boshqa joyda ko‘radi: biomexanikada.

U o‘z karerasida ikki marta zarbasi va tayyorgarligini tubdan o‘zgartirgan. “Poydevorgacha buzib, qayta qurish” bosqichidan o‘tgan. Endi esa o‘sha og‘riqli tajribani qisqa yo‘lga aylantirishga urinmoqda.

“Men o‘yinchilarga o‘z biomexanikasini shunday sozlashga yordam beraman-ki, ular o‘zlarini yaxshi his qiladigan nuqtaga eng qisqa yo‘l bilan yetishsin,” — deydi u.

Bu shunchaki oyoq harakati yoki tayyor turish pozitsiyasini o‘zgartirish emas. Bu — o‘yinchining zarba paytidagi his-tuyg‘usini, tanasining ritmini qayta sozlash.

Uning afzalligi shundaki, hozirgi avlod o‘yinchilari uni buni maydonda qilgan holda ko‘rishgan. Senior pro sifatida u allaqachon bu “rite of passage”dan o‘tgan. Endi esa MI kiyinish xonasida o‘sha yo‘lni boshqalarga ko‘rsatadi.

Endi navbat MIga

Mumbai Indians hozir o‘zini yana bir bor isbotlashi kerak bo‘lgan klub. Sovrinlar vitrinasi to‘la, lekin so‘nggi yillarning savollari ham kam emas.

Bu bosim. Bu imkoniyat.

Uthappa uchun esa bu murabbiy sifatida haqiqiy sahnaga chiqish. U endi mikrofon ortida emas, nets ichida, video tahlil xonasida, dugout yonida ishlaydi. Uning vazifasi — MI hujumini yana bir bor liganing eng xavfli quroliga aylantirish.

Savol shunday: u o‘zining “understated” murabbiylik uslubi bilan MIni qayta cho‘qqiga olib chiqa oladimi — yoki bu franchayzening navbatdagi og‘riqli o‘zgarish davriga aylanadimi?

Pinco Avto Omad — 12 ta avto uchun sovrinli o‘yinga qo‘shil